All Posts By

Teso Corp

СОРИЛТ БОЛ БОЛОМЖ

By | Мэдээ | No Comments

Өнөөдөр 21-р зуун гарснаар технологийн хөгжлийн үе тохиож хүний үйл ажиллагаа илүү хялбар, хурдан шуурхай болохоос гадна бизнесийн уламжлалт тогтолцоо, байгууллагын соёл, процесст ч томоохон өөрчлөлт гарч,  хэн түрүүлж үйл ажиллагаандаа шинэчлэлийг хийж, түүнд бэлтгэгдэн дасан зохицож чадсан нь зах зээлд байр сууриа хадгалж, улам хөгжих боломж нь бүрдэж байна.

ТЭСО корпорацийн хувьд ДИЖИТАЛ ШИЛЖИЛТ-ийг өнгөрөгч 2020 оноос эхлүүлэн ойрын зорилтоо болгон хэрэгжүүлэхээр төлөвлөж байсан бол цар тахал гарснаар бидний энэ шинэчлэлийг улам хурдасгаж, хурдан шуурхай процессдоо нэвтрүүлэх нөхцөл бүрдсэнээр хүнс, барилга зэрэг томоохон 15 салбар компанидаа нэгэн зэрэг нэвтрүүлж, энэхүү өөрчлөлтөд ажилчдаа бэлтгэж, чадавхжуулан, процессоо хялбарчлаад зогсохгүй цахим хэрэглээг шат шатандаа нэвтрүүлэн нийгэмд хариуцлагатай, байгальдаа ээлтэй компани болохын төлөө зорин ажиллаж байна.

ТЭСО корпораци нь дотоодын үндэсний үйлдвэрлэгч компаниуд дундаасаа компанийнхаа бүх үйл ажиллагаанд нэгэн зэрэг ERP системийг нэвтрүүлж, мэдээлэл технологийн эрин зуунд хөл нийлүүлэн алхаж, Монголдоо анхдагч болж урагшлан хөгжиж байна. 

Бидний үйл ажиллагаандаа нэвтрүүлсэн ДИЖИТАЛ ШИЛЖИЛТ нь:

  • Цаг хугацааг хэмнэж
  • Цаасны хэрэглээг бууруулж
  • Мэдээллийн нэгдсэн санг бий болгож
  • Нэгж хоорондын хамтын ажиллагаа сайжруулж
  • Ажлын ачааллыг бууруулж
  • Бүтээмжийг нэмэгдүүлж
  • Байршил хамаарахгүй гэрээсээ ажиллах боломжийг бүрдүүлж
  • Байгууллагын процессыг илүү стандартжуулж өгснөөрөө олон давуу талуудыг бидэнд олгож байна.

Манай корпорацийн хувьд  нийт ажилчдын 65% гаруй хувийг анхан шатны буюу үйлдвэрийн ажилчид эзэлдэг бөгөөд эдгээр бүх ажилчид маань бүх шатны менежер, удирдлагуудтай зэрэгцэн дижитал соёлд суралцан хөгжиж байна.

Бидний энэхүү шинэчлэл нь дэлхийн зах зээлд үйл ажиллагаагаараа Монголыг төлөөлөх жишиг компани болохын төлөө зорин хийсэн томоохон эхлэл гэж харж байна.

Өдрөөс өдөрт дэлхий өөрчлөгдөн хувьсаж, хөгжлийн шинэ шатууд алхам алхамаар ирж байгаа энэ үед өрсөлдөөнийг түүчээлэхийн тулд дижитал шилжилтийг нэвтрүүлэхээр ийнхүү зорьсон нь бидний хувьд ололт байлаа.

Сорилтыг боломж болгон ашиглацгаая.

Монгол улсаас анх удаа QR системийг нэвтрүүлэн бүтээгдэхүүнээ экспортлож байна.

By | Мэдээ | No Comments

Бид Олон улсын зах зээлд бүтээгдэхүүнээ экспортлон, гадны хэрэглэгчийн эрэлт хэрэгцээнд нийцсэн бүтээгдэхүүн үйлдвэрлэж байна. БНХАУ-ын томоохон зах зээлд хуурамч бараа бүтээгдэхүүн үйлдвэрлэгчийн асуудал их тохиолдож байгаа тул хэрэглэгчийг хохироохоос сэргийлж, хэрэглэгчээ төөрөгдүүлэхгүй байх үүднээс үйлдвэрлэсэн бүтээгдэхүүнийхээ найдвартай байдлыг баталгаажуулах зорилгоор Монгол улсаас анх удаа QR системийг нэвтрүүлэн бүтээгдэхүүнээ экспортлож байна. Энэхүү QR код нь мөнгөн тэмдэгтийн үнэт цаасан дээр хэвлэгдэж, бүтээгдэхүүний савлагаан дээр наагдаж байгаа ба хэрэглэгч утсаараа QR-ийг уншуулан манай компанийн албан ёсны мэдээлэл, бүтээгдэхүүний дэлгэрэнгүй мэдээллийг авахаас гадна давхар урамшуулал авч байгаагаараа онцлогтой юм.

БНСУ-руу экспорт хийж байна

By | Мэдээ | No Comments

Дархлаа дэмжих үндэсний шилдэг ЗӨВ /Монгол Брэнд/-ийг Монгол хэрэглэгчид төдийгүй БНСУ, БНХАУ-ын хэрэглэгчид тогтмол хэрэглэж, дархлаагаа дэмжиж байна. Монгол брэнд олон улсын зах зээлд амжилттай танигдаж, уул уурхайн бус хүнсний экспортын орлого бий болгож байна.

ДИЖИТАЛ ШИЛЖИЛТ

By | Мэдээ | No Comments

21-р зуунд хүн төрөлхтөн томоохон хөгжлийн үе тохиож байгаа ба үүнийг Цахим зуун буюу Дижитал эрин хэмээн нэрийдэж байна. Саяхныг хүртэл хэрэглэж байсан дугтуйтай захидал, гэрийн утас хэрэглээнээс гарч, дэлхийн өнцөг булан бүртэй хормын төдийд цахим хурдаар холбогддог болсон байна. Үүнээс дүгнэхэд үнэхээр бид технологийн дэвшлийн ачаар хэд дахин өндөрт хүрчээ.

ТЭСО корпораци нь 2020 оноос эхлэн “Дижитал шилжилт”-ийг үйл ажиллагаандаа хөгжүүлж, нэвтрүүлснээр компанийн үйл ажиллагааг илүү үр ашигтай болгох, өдөр тутмын процессийг сайжруулж бүтээмжээ нэмэгдүүлэх, зардлыг бууруулах, ажлын үр дүнг бодит хэмжих, цаг хугацаа хэмнэсэн шийдвэрүүд гаргах гэх мэт олон давуу талуудыг бий болгоод байна.

Дэлхийн томоохон компаниуд технологид суурилсан бизнесийн үйл ажиллагааг нэвтрүүлэн амжилттай явж байгаа өнөө үед ТЭСО корпораци дэлхийн хөгжилтэй зэрэгцэн салбарын хөгжлийг нэг шат ахиулан ажиллахын төлөө хувь нэмрээ оруулан ажиллаж байна.

Тэсо сургалт хөгжлийн академи

By | Uncategorized | No Comments

ТЭСО корпораци нь 2020 оноос эхлэн ажилчдынхаа сурч хөгжих боломжийг нэмэгдүүлэх зорилгоор дотоод ажилчдаа сургагч багшаар бэлтгэн ажилчдынхаа суурь, удирдах, мэргэжлийн ур чадварыг дээшлүүлэх, карьер төлөвлөлтийг дэмжих зорилгоор “ТЭСО СУРГАЛТ ХӨГЖЛИЙН АКАДЕМИ”-ийг байгуулсан.
Тус академи нь корпорацийн эрхэм зорилгыг дэмжих, ажилчдын чадавхыг дээшлүүлэх 10 модуль бүхий 30 гаруй сургалтыг зохион байгуулахaaр дотоод сургагч багш нараа мэргэшүүлэн бэлдээд байна.
ТЭСО СУРГАЛТ ХӨГЖЛИЙН АКАДЕМИ нь тасралтгүй суралцах процессыг ажилчдад бий болгосноор ажилчдыг мэдлэг чадвараа тогтмол хөгжүүлэх, корпорацийн хэмжээнд ур чадвартай ажилчдыг бий болгон өөрчлөлт, өрсөлдөөнд давуу байдлыг бий болгох корпорацийн хөгжил дэвшлийг нэг алхам урагшлуулах хөшүүрэг болох юм.

Малчдын боловсруулсан сүү, Монгол жимсийг валют болгож байна

By | Uncategorized | No Comments

“Зөв аарц” 51 сая хүн амтай БНСУ-д албан ёсоор экспортлогдож эхэлжээ. Монголын олон мянган залуучууд Солонгос улсад ажиллаж амьдарч байна. Тэдэнд эх орныхоо бүтээгдэхүүнийг хэрэглэх боломжтой болсон сайхан үйл явдал болжээ. Зөвхөн Монголчууд гэлтгүй Солонгос иргэд ч маш их сонирхож, худалдан авалтыг нэмэгдүүлсэн байна.

Дэлхий дахин COVID-19 үүдэлтэй санхүүгийн асуудал үүсч, улс орны хувьд эдийн засгийн хүндхэн үетэй нүүр тулж байгаа энэ цагт Монгол брэнд худалдааны томоохон зах зээлтэй улс орнуудад экспортлогдож байгаа нь эдийн засаг, экспортын хувьд томоохон боломж юм.

“Зөв аарц” бол малчдаас түүхий эдээ авч Монголд ургасан жимсээр баяжуулсан “Монгол бүтээгдэхүүн”.  Малчдын боловсруулсан сүү, Монгол жимсийг валют болгож байна гэдэг бол экспортын хамгийн том үнэ цэнэ гэж харж байна.  

“Nice Mongolia Cargo” тээвэр зуучлалын компанийн захирал Д.Даваабаатартай  холбогдлоо.

-Сайн байна уу? Танд энэ өдрийн мэнд хүргэе.

Сайн. Сайн байна уу?

-Та бүхэн Зөв брэндийн “Зөв аарц”-ыг БНСУ-д худалдаалж эхэлсэн байгаа. Юуны өмнө баяр хүргэе. Гаднын улс руу үндэсний бүтээгдэхүүнээ гаргаж экспортлох ажил хэцүү байсан уу?

Баярлалаа. “Зөв аарц”-ыг анх Солонгос улс руу экспортлох саналыг 2020 оны 5 дугаар сард ТЭСО компаниас санал болгосон. Тухайн үед Корона вирус гарсан асуудалтай үе байсан. Солонгос улсад гаднаас бүтээгдэхүүн оруулж ирэх асуудлаар судалгаа хийж, материалаа бүрдүүлж, өнгөрөгч 9 дүгээр сард хүнсний бүтээгдэхүүн оруулж болох зөвшөөрлөө авлаа. Анхны “Зөв аарц”-аа 5 төрөлтэйгөөр ачилт хийсэн. Солонгос улсад бүтээгдэхүүн маань очоод шинжилгээнд ороод 12 сарын сүүлээр албан ёсоор худалдаалах зөвшөөрлөө авсан. Бараг нийт хагас жилийн хугацааг зарцуулж “Зөв аарц” маань Солонгос улсад албан ёсоор худалдаалах боломжтой болсон.

-Солонгос иргэд “Зөв аарц”-ыг хэрхэн хүлээн авч байна?

Солонгосчууд маш их холбогдож байна. Их сайн хүлээн авч байгаа. Солонгосын худалдаа эрхлэгчид ч мөн “Зөв аарц”-ыг худалдан авч, цааш нь борлуулах сонирхол маш их байгаагаа илэрхийлж, утсаар холбогдож байна. Олон сүлжээ дэлгүүр, жижиг худалдааны төвүүд өөрсдөө худалдан авч цааш нь иргэддээ борлуулах сонирхолтой байгаа.

-Бүтээгдэхүүний онцлогоос та бидэнд мэдээлэл өгөх үү?

Солонгос улсад байгаа Монголчууд гэлтгүй Эх орондоо байгаа Монголчуудын хувьд ч маш их хэрэглэх дуртай бүтээгдэхүүн шүү дээ. Хүйтэн сэрүүний улирал болоод Корона вирустай энэ үед дархлаа дэмжих амин дэмээр баялаг бүтээгдэхүүн байгаа. Энд байгаа Монголчууд болоод Солонгосчууд маань дархлаа дэмжих Эко бүтээгдэхүүнтэй болсондоо маш  их баяртай байгаа. Монголчууд талархсан сэтгэгдлээ хүртэл илэрхийлж байна.

-“Зөв аарц” Солонгос улсад ямар дэлгүүрээр худалдаалагдаж байгаа вэ?

Одоогоор Карго болон Монгол тауны дэлгүүр, захиалга шууд хүргэлтээр борлуулагдаж байна. Цаашид худалдаалах цэгүүдээ нэмэх болно.

-“Зөв аарц” хэдэн төгрөгөөр худалдаалагдаж байна?

Манай компанийг оруулж ирэхээс өмнө нэлээн үнэтэй байсан. 10 ширхэгтэй хатаасан аарц 20,000 вон гэх зэргээр худалдаалагдаж байсан. Харин манайх бол 50%-иар бага үнээр борлуулж байна. 10 ширхэгтэй хатаасан аарц 10,000 вон.

-БНСУ-ын зах зээлд Монголын өөр хүнсний бүтээгдэхүүн нийлүүлэгдэж байсан уу?

Сүү, сүүн бүтээгдэхүүний зах зээлд бол “Зөв аарц” анхных болж байгаа. Бүх төрөл нь маш их зарагдаж байгаа. Эхний ээлжинд орж ирсэн бүтээгдэхүүн маань дууссан. Чацаргана, Аньстай, цэвэр аарц болон аарцан үрэл эхний ээлжинд орж ирсэн. Өнөө маргаашгүй Монголоос бүтээгдэхүүн  ирж байгаа. Энэ өвөл бол Солонгост байгаа Монголчууд болоод Солонгосын иргэд дархлаагаа маш сайн дэмжихээр боллоо.

Бидэнд мэдээлэл өгсөн танд баярлалаа. Ажлын өндөр амжилт хүсье.

Цар тахлын үед 13%-ийн өсөлт үзүүлсэн ХАА салбар экспортын бүтцэд өөрчлөлт оруулж чадах уу?

By | Uncategorized | No Comments

Цар тахлын үед хөдөө, аж ахуйн салбарт л өсөлт гарсан бөгөөд өмнөх оны мөн үеэс бодитоор 13% өсөж, хамгийн өндөр бүтээмжийг бий болгоод буй.

Ингэхдээ бүр манай улсын экспортын 90 хувийг дангаар бүрдүүлдэг уул уурхайн салбараас ч илүү бүтээмжийг бий болгосныг Дэлхийн банкны хөнгөлөлттэй зээлийн санхүүжилттэй Экспортыг дэмжих төслийн багийнхан онцолж байв.

Нийт экспортын 10 хувийг уул уурхайн бус салбар эзэлж, үүний 60-70 хувийг нэмүү өртөг шингээгүй түүхий эд болох ноос ноолуур, амьтны үс, хялгас эзэлж байгаа одоогийн нөхцөлд ХАА салбараас юу экспортлох, хэрхэн нэмүү өртөг шингээх, энэ чиглэлд салбарын яам болон олон улсын байгууллагууд хэрхэн ажиллаж байгааг сурвалжилсан юм.

Тал нутагт нь 90 сая толгой мал бэлчиж байгаа манай улсыг дэлхий махны томоохон бэлтгэн нийлүүлэгч гэж харж буйг ХХААХҮЯ-ны Бодлого, төлөвлөлтийн газрын дарга Ц.Болорчулуун онцолж байв.

Дэлхий дахин манай улсыг махны томоохон бэлтгэн нийлүүлэгч гэж харж байна

Мөн тэрбээр “Махны экспортын чиглэлд жилээс жилд ахиц гарч байгаа. Махыг хэд хэдэн янзаар гаргаж байна. Тухайлбал, дулааны аргаар боловсруулсан хонь, ямааны мах, гүн хөлдөөсөн адууны мах гэх мэт. Өнгөрсөн жил 58.6 мянган тонн мах экспортолсон бол ирэх дөрвөн жилд 150 мянган тоннд хүргэхийг зорьж байгаа.

БНХАУ-руу гурил экспортлох асуудал сүүлийн хоёр жил гаруйн хугацаанд судалгаа, яриа хэлэлцээ хийгдэж, сая БНХАУ-ын Гадаад харилцааны сайдын айлчлалын бүрэлдэхүүнд Чанар, хорио цээрийн яамны төлөөлөл нь багтаж ирээд “Улаанбуудай болон хөх тарианы гурилын хорио цээрийн протокол”-д гарын үсэг зурсан.

Одоогийн байдлаар гурилын үйлдвэрлэл дотоодын хэрэгцээний түвшинд хүрч байгаа бөгөөд үйлдвэрлэлээ нэмэгдүүлбэл БНХАУ-руу гурил экспортлох гарц нээгдсэн гэсэн үг.

Гурилын үйлдвэрүүдийн хувьд дэлхийн стандартад нийцсэн сүүлийн үеийн тоног төхөөрөмжийг суурилуулсан бөгөөд жилдээ нэг сая орчим тонн улаанбуудай тээрэмдэх хүчин чадалтай. Тиймээс улаанбуудайн тариалалтаа нэмэгдүүлэн ирэх дөрвөн жилд гурилын экспортоос тодорхой хэмжээний орлого олно гэж тооцож байгаа.

Түүнчлэн хүнсний ногоонууд дундаас төмсийг экспортлох боломжтой гэж харж байгаа. Гэхдээ төмс хэлбэрээр нь биш, нэмүү өртөг шингээн, цардуул үйлдвэрлээд экспортлох юм. Тиймээс цардуулын хоёр үйлдвэр барихаар олон улсын байгууллагын зээл, тусламж хөөцөлдөж байгаа.

Газар тариалангийн үйлдвэрлэл уринш, улаанбуудай гэсэн сэлгээтэй явдаг. Уриншид өнжиж байгаа талбайдаа төмс тарьчихвал хөрсийг азотоор баяжуулж, дараа жилийнхээ улаанбуудайн ургалтад ч эерэг нөлөө үзүүлнэ” гэдгийг хэлсэн юм.

МАЛЧНЫ ХОТОН ДАХЬ МАХ, СҮҮГ ХЭРХЭН ЭКСПОРТЫН ШААРДЛАГА ХАНГАХ БҮТЭЭГДЭХҮҮН БОЛГОХ ВЭ?

Хэнтий аймгийн Биндэр сумын малчин өрхийн сүү, ХУД-т хашаандаа жимс тариалдаг айлын чацаргана, Сэлэнгийн шаамар сумын зөгийн балыг экспортын шаардлага хангах бүтээгдэхүүн болгох үйл явц хэрхэн өрнөж байгааг жишээгээр танилцуулъя.

Жишээ 1: Сүүг хатаасан аарц болгож, БНХАУ-руу албан ёсоор экспортолж байна

Хэнтийн аймгийн Биндэр сумын малчин өрх үнээгээ саагаад сүүгээ сумын төвд байрлах “Сүү татан авалтын цэг”-т хүргэнэ. Энэ цэгт сүүг газар дээр нь түргэн хугацаанд шинжилж аваад, Улаанбаатар хүртэл зориулалтын хөргүүртэй автомашинаар тээвэрлэн Тесо компанийн Милко сүүний үйлдвэрт авчирч аарц үйлдвэрлэдэг. 2018 онд тус үйлдвэрт нэвтрүүлсэн нам даралтын хатаах технологиор аарцаа хатааснаар эцсийн бүтээгдэхүүн бэлэн болдог байна. Хатаасан аарцыг одоогоор БНХАУ-руу албан ёсоор экспортолж байгаа бөгөөд Хойд Америк руу экспортлохоор бэлтгэл ажил хийгдэж байгаа ажээ.

Ингэснээр малчин өрх тогтвортой орлоготой, үйлдвэрлэгч амин дэмээр баялаг үнээний шингэн сүүтэй болж буй.

Жишээ 2: 400 гаруй бүтээгдэхүүн “Органик монгол” шошго аваад байна

Дэлхийн банкны хөнгөлөлттэй зээлийн санхүүжилтээр ХХААХҮ-ийн салбарт хэрэгжиж буй Экспортыг дэмжих төслийн хүрээнд монгол брэнд бий болгоход зорьж байгааг төслийн зохицуулагч А.Хашцэцэг хэлсэн.

Тэрбээр “Монгол ноолуур, монгол мах, монгол хүнсний ногоо, монгол зөгийн бал, монгол бяслаг гэсэн чиглэлээр маркетинг хийж, олон улсад таниулах чиглэлээр ажиллаж байгаа. Энэ хүрээнд ХХААХҮЯ-наас “Органик монгол” стандартыг бий болгож, одоогийн байдлаар 400 гаруй бүтээгдэхүүн энэ стандартыг хангаж, шошго аваад байгаа” хэмээсэн юм.

Ингэхдээ өрхийн аж ахуй эрхэлдэг иргэдийн үйлдвэрлэсэн бүтээгдэхүүн бүрд шошго олгох боломжгүй тул зөгий үржүүлдэг 10, 20, 100 айлын зөгийн балыг нэгдсэн стандартаар томоохон үйлдвэрүүдэд төвлөрүүлж, олон улсын чанар стандартад нийцүүлээд “Монгол зөгийн бал” гэсэн шошготойгоор экспортлох боломж байгаа гэдгийг ХХААХҮЯ-ны Бодлого, төлөвлөлтийн газрын дарга Ц.Болорчулуун хэлж байв.

Жишээ 3: Шинэ технологиор хөнгөлж, махны гарцыг нь нэмэгдүүлсэн хурганы махыг Иран руу экспортлов

Манай улсын махны экспортын 80-90 хувийг БНХАУ эзэлж байгаа бөгөөд ОХУ, Иран руу бага зэрэг мах гаргаж байгаагаас гадна Вьетнам руу мах, дайвар бүтээгдэхүүн гаргахаар хорио цээрийн асуумжуудаа тохироод явж байгаа ажээ.

Эндээс Иран руу хурганы мах экспортолсон жишээг онцлон танилцуулбал, малын махан ашиг шимийг богино хугацаанд нэмэгдүүлэх шинэ технологийг ХААИС-ийн хүндэт доктор Ч.Нилбаатар, цахилгааны инженер Д.Батжаргал болон докторант С.Нямхүү нар хамтран нэвтрүүлжээ. Энэхүү технологи нь бяруу болон 2-3 сартай хургыг цахилгаан соронзон долгионы багаж ашиглан, төөнөж хөнгөлөх арга юм. 2-3 сартайдаа буюу өсөлт нь эрчимтэй явагдаж байхад уламжлалт аргаар хөнгөлснөөр мал өвдөж, стресстдэг бөгөөд бие нь давжаарах шалтгаан болдог байна. Тиймээс цахилгаан соронзон долгионы багаж ашиглан малд өвдөлтгүйгээр хөнгөлөх /үрийн сувгийг нь тасалж/ шинэ арга ашигласнаар махны ашиг шим нь нэмэгдэх нөхцөлийг бүрдүүлжээ.

Судлаачид Төв аймгийн Баяндэлгэр сумын “Ногоолин дэвш” сургалтын төвийг 2019 онд байгуулж, 300 гаруй хургыг дэвшилтэт аргаар хөнгөлөн бэлчээрээр таргалуулж туршсаны үр дүнд 7-8 сартай хурганы жинг 18-19 сартай төлөгний хэмжээнд хүргэжээ.

Төөнөж-хөнгөлөх аргыг хэрэглэснээр хурганы гулууз махны гарц 1.35 дахин өсөж, уургийн агууламж өндөртэй, зөөлөн буюу Иран улсаас тавьж буй шаардлагыг хангасан тул экспортолж эхлээд байгаа аж.



Манай улсын нийт газар нутгийн 70 хувьд 90 орчим сая/энэ жил хүлээн авсан төлтэйгөө нийлээд/ мал бэлчиж байгаа бөгөөд төрөөс 2029 он хүртэл нийт мал сүргийн тоог жилд дунджаар 2 хувиар бууруулахаар төлөвлөж буй. Энэ тохиолдолд махаа экспортлох нь зайлшгүй. Бага малын, зөөлөн мах хүсэж буй 78 сая хүн амтай Иран улс махны экспортын том урсгал ч байж болох юм.

БНХАУ руу гурил экспортлох боломж нээгдэж, ирэх дөрвөн жилд тодорхой хэмжээний орлого олохоор төлөвлөж буйг ХХААХҮЯ-наас мэдээлсэн.

Хүнсний томоохон үйлдвэрүүд, тэр дундаа сүү, мах, гурилын үйлдвэрүүд хэдийн олон улсын чанар, стандартыг хангах болсон. Сүүний үйлдвэрүүд гэхэд дэлхийд эхний тавд бичигдэхээр орчин үеийн томоохон тоног төхөөрөмжийг нэвтрүүлсэн хэдий ч нийт хүчин чадлынхаа 30 хувийг л ашиглаж буй. Энэ нөхцөлд малчин өрх, хоршоо, жижиг дунд үйлдвэрийн бүтээгдэхүүнийг олон улсын шаардлага хангасан томоохон хүнсний үйлдвэрүүдээр дамжуулан ЭКСПОРТЫН БҮТЭЭГДЭХҮҮН болгох бодлого баримталж байна.

эх сурвалж: IKON.MN

SKY GARDEN RESIDENCE төслийн эхний ээлжийг УЛСЫН КОМИСС хүлээн авлаа

By | Uncategorized | No Comments
“Хүн төвт” төлөвлөлтийг хэрэгжүүлэгч “Тэсо Пропертис” группийн хэрэгжүүлж буй SKY GARDEN RESIDENCE төслийн эхний ээлжийг УЛСЫН КОМИСС хүлээн авлаа.
Бидний хамгийн нандин, эрхэм, ирээдүй болсон хүүхдүүд эрүүл, аюулгүй, өөрсдөө сурч хөгжих боломж дээд зэргээр хангагдсан орчинд өсөх ёстой. Хөгжин дэвших ирээдүйн төлөө хүн төвтэй бүтээн байгуулалтыг Сингапурын CPG компани нь “Kids First” буюу “Хүүхэд тэргүүнд” үндсэн концепцийг боловсруулж, дотоодын шилдэг компаниуд хөгжүүлэн “SKY GARDEN RESIDENCE” орчин үеийн өндөр зэрэглэлийн орон сууцны төслийг бүтээн байгуулж байна.
ИРЭЭДҮЙГЭЭ ХАЙРЛАЯ
KIDS FIRST concept

Тэсо корпораци СЭЗИС-тай Санамж бичигт гарын үсэг ёслолын ажиллагаа боллоо

By | Uncategorized | No Comments

         

Улсын болон хувийн бүхий л байгууллагуудын нэн тэргүүнд тавигддаг, анхаарч ажилладаг хэсэг нь хүний нөөцийн асуудал байдаг. Тэсо корпораци нийгмийн хариуцлагын хүрээнд оюутан залуусыг анх сургуульд элсэн орсон цагаас буюу 1-р курсээс эхлэн ажлын гараан дээр ажилллах дадлагаа бодитоор хийж мэдрэх, ажлын амт, хариуцлага гээд олон зүйл дээр хөтөлж гаргахаар энэхүү санамж бичигт гарын үсэг зурлаа. Энэ нь хувийн хэвшлийн байгууллага Боловсролын байгууллагатай хамтран ажиллаж мэдлэг боловсролын онол, парактикт суурилсан чадварлаг боловсон хүчинг бэлтгэн гаргахад чиглэсэн чухал ач холбогдолтой ажил юм.

Энэхүү ажил нь нийгмийн эдийн засагт тулгамдсан асуудлыг боловсролын байгууллагын оролцоотой байлгах, хүний нөөцийг анхнаас нь чадавхижуулах зэрэг олон талын хэрэгцээтэй хөтөлбөрүүдэд оюутнууд хамрагдах ба хувийн хэвшлийнхний хувьд тулгамддаг туршлагатай ажилтан буюу практикт суурилсан боловсон хүчин төрөн гарахад томоохон түлхэц болно гэж үзэж  байгаа юм байна.

Бид Тэсо корпорацын Гүйцэтгэх захирал хатагтай С.Болортой уулзаж цөөн хором ярилцлаа.

  • Санамж бичигт Тэсо корпораци болон СЭЗИС-иуд санамж бичигт гарын үсэг зурсанаараа одоо суралцаж байгаа оюутнууд болон төгсөгсчидөд ямар боломжууд нээгдэж байгаа вэ?

Манай компаны зүгээс энэхүү санамж бичигт гарын үсэг зурж байгааг нэг талаасаа нийгмийн хариуцлага гэж харж байгаа харин нөгөө талаасаа бид 1-р курсээс нь эхлээд оюутнуудад парактик дээр суурилсан мэдлэгт нь тусалж байгаа нь ирээдүйн сайн ажилтан албан хаагчдаа бэлтгэж байна гэж харж байгаа. Мөн төсөл хөтөлбөр, судлагааны ажлуудыг хамтран хийх, нийгмийн болон олон нийтийн боловсролыг дээшлүүлэхэд анхаарч ажиллах олон талын асуудалд шийдэл олох ач холбогдол бүхий санамж бичигт гарын үсэг зурлаа.

  • Тэсо корпорацын хувьд маш олон мянган хүнийг ажлын байраар ханган ажилладаг. Энэхүү санамж бичигт гарын үсэг зурсанаар шинэ боловсон хүчнүүдэд тулгардаг туршлагатай ажилан ажилд авна гэдэг шалгуураас зайлсхийх боломжтой гэж үзэж байгаа юу.

Оюутан байхад дадлага хийх газар хайх, төгсөөд ажилд ороход ажлын туршалагатай байх, 2-3 жил ажилласан байх гэх мэт шалгуурууд тавьж залуу мэргэжилтнүүдэд хүндрэл гарах нь их байдгийг хэн хүнгүй л мэдэх байх.

Тэсо корпорацын хувьд улсын болон томоохон хувийн сургуулиудын шилдэг төгсөгчдөөр хүний нөөцийн багаа бүрдүүлэн ажилладаг ба Санхүү эдийн засгийн сургуультай хамтран ажиллах санамж бичигт гарын үсэг зурсанаар чадварлаг ажилтан албан хаагчдаар ирээдүйгээ бэлтгэх чухал ач холбогдолтой хэмээн үзэж байгаа юм байна.